Оппозициялық кандидат Нұрлан Әуесбаев ОСК-ға құжаттарын тапсырды

Жалпыұлттық социал-демократиялық партиясынан (ЖСДП) кандидат Нұрлан Әуесбаев Орталық сайлау комиссиясына тіркеу үшін құжаттарын тапсырды.

Президенттікке үміткерлердің ешқайсысы әлі ресми тіркелген жоқ, бірақ мемлекет басшысы лауазымына төрт үміткердің үшеуі құжат тапсырған.

- Біз жақсы дауыс жинаймыз деп ойлаймын. Иә, біз жеңіске сенімдіміз, өйткені біздің партиямыз социал-демократиялық принципті басшылыққа алады, жемқорлық пен олигархиямен күресетін боламыз. Сондай-ақ саясатта да, экономикада да әлеуметтік әділеттілік үшін, - деді кандидат.

Нұрлан Әуесбаев – Қазақстан Жалпыұлттық социал-демократиялық партиясының астаналық кеңсесінің жетекшісі. Ол Түркістан облысының тумасы, Астана қаласының тұрғыны. Екі жоғары білімі бар, М.Әуезов атындағы Оңтүстік Қазақстан мемлекеттік университетін бітірген, ұзақ уақыт жергілікті атқарушы органдарда жауапты қызметтер атқарған.

Қазақстанда президенттік сайлау кандидаттарды тіркеу аяқталған сәттен бастап, яғни 11 қазанда басталады. Сайлау 20 қарашаға белгіленген.