Оппозициядан сескенген Сирия сарбаздары Иракқа кетті

Сирия астанасын қарулы оппозиция бақылауына алғаннан бері елдің 4 мыңнан астам жауынгері Ирак аумағына өтіп кеткені мәлім болды, деп хабарлайды Orda.kz. 

Сириялық сарбаздар көрші елге кетіп, қаруларын, оқ-дәрілері мен брондалған көліктерін тапсырған. Олар уақытша лагерьлерге орналастырылды. 

Ал сириялық босқындар Түркиядан еліне кетіп жатыр. Башар Асад режимі құлағалы еліне оралуға асыққан сириялық босқындардың қарасы көбейген. Дүйсенбі күні Сирияның шекара бекеттерінде ұзын-сонар кезек пайда болды. Әсіресе, Ливан және Түркиямен шекарада босқындардың саны көп.

2011 жылы азаматтық соғыс басталғаннан бері 6,7 миллионға жуық сириялық елден көшіп кеткен. Олардың дені Түркия, Ливан және Иорданияда тұрады.

Еске салайық, 8 желтоқсан күні Сирияда үкіметке қарсы қарулы топтар ел астанасы Дамаскіні басып алды. Президент Башар Асад елден қашты. Асад режиміне қарсы қарулы топтар жергілікті телеарнадан мәлімдеме жасап, Дамаскіні «азат еткенін» және президент Башар Асад үкіметін  құлатқанын мәлімдеген.  Елден қашқан Башар Асад Мәскеуді паналады. Оның Мәскеуде 20 шақты пәтері бары анықталды.