Оператор 100 метрге жүгірушілерді шаң қаптырды (видео)

Әдетте кадрдан тыс жұмыс істеп, халыққа қызықты бейнелер сыйлайтын оператор бұл жолы өзі кейіпкерге айналды. Жұртты таң қалдырған желаяқ оператордың бейнетүсірілімі әлеуметтік желіде жылдам таралып кетті.

Әлеуметтік желіде камера ұстаған оператордың 100 метр қашықтыққа жүгірушілерді шаң қаптырып, жеткізбей келе жатқан видеосы тарады.  

Оқиға Қытайдың Шаньси провинциясында болған, оператор  жеңіл атлетикадан университеттер арасындағы чемпионатты түсіруге келген. Видео TRT телеарнасының Facebook парақшасында жарияланды.

Өз ісінің шебері осы сәтте қызықты бейне түсіруден басқа ештеңе де ойламаған болар. Дегенмен көзі қарақты көрермен қызықты сәтті қалт жібермегені анық.  

Камера ұстаған жігіт қолындағы техниканың салмағы төрт келіден асатынына қарамастан, жылдамдығы жағынан  спортшыларға дес бермей, қашықтықтың соңына дейін жүгірді.

Ең қызығы көрерменнің көпшілігі оны жарыстың жеңімпазы деп санайды. Қолданушылардың бірі видео кейіпкері келесі жолы жарысқа ресми түрде қатысу керек екенін де жазды.