Оңтүстік Кореядағы сот ғимараты алдында мыңдаған адам президентті қолдап шеруге шықты

Оңтүстік Корея президенті Юн Сок Ёлдың қамауға алу мерзімін ұзарту қажеттігі туралы тыңдау өтіп жатқан Батыс аудандық сотында наразылық шеруге шыққан 40-қа жуық адам ұсталды, деп хабарлайды Orda.kz.

en.yna басылымының жазуынша, бірінші болып президентті босатуды талап етіп сот ғимаратының қоршауынан асып түскен ер адам ұсталған. Содан кейін оның артынан тағы 16 адам еріп, олар да қоршаудан асып кетіп, ұсталды.

Сот аумағына кіруге байланысты барлығы 22 іс қозғалғаны нақтыланды. Тағы 10 адам 15 қаңтарда президентті тұтқындаған сыбайлас жемқорлыққа қарсы департамент көлігіне шабуыл жасап, тәртіп сақшыларына кедергі келтірді деген күдікке ілінген. Жеті адам полицияға күш қолданса, тағы біреуі журналистке шабуыл жасаған.

Порталдың хабарлауынша, сот алдында президент жақтастары оны қамаудан босатуды талап етіп, наразылық шеруі жалғасты. Полиция шеруге 44 мыңға дейін адам қатысқанын хабарлады.

Бұған дейін 15 қаңтарда Юн Сок Ёл Оңтүстік Корея тарихындағы тұтқындалған алғашқы президент екені туралы хабарлаған болатынбыз.