Ономастикалық комиссия Сара Назарбаева ашқан институт атауын өзгертуге рұқсат берді

Республикалық ономастикалық комиссия экс-президент Нұрсұлтан Назарбаевтың зайыбы Сара Назарбаева негізін қалаған Адамның үйлесімді дамуы ұлттық институтының атауын өзгертуге рұқсат берді, деп хабарлайды Orda.kz.

«Келесі мемлекеттік нысандардың, мемлекеттік заңды тұлғалардың, мемлекет қатысатын заңды тұлғалардың ұсыныстары бойынша атауларын өзгерту туралы оң қорытынды берілсін: Қазақстан Республикасы Ғылым және жоғары білім министрлігінің ұсынуы бойынша (... ) «Адамның үйлесімді дамуы ұлттық институты» ендігі жерде  «Өркен» балалар салауаттылығы ұлттық ғылыми-тәжірибелік институты» болып өзгертілсін» делінген Республикалық ономастикалық комиссия қорытындысында. 

Комиссия сондай-ақ бірқатар атауларды өзгертуге рұқсат берді:

- Рудный индустриалды институтын -  Рудный индустриалды университетіне;

- Бауыржан Момышұлы атындағы Алматы республикалық «Жас Ұлан» мектебін -  Бауыржан Момышұлы атындағы әскери колледжге;

- Екі мәрте Кеңес Одағының Батыры Талғат Якупбекұлы Бигелдинов атындағы Қарағанды ​​республикалық «Жас Ұлан» мектебін - Талғат Бигелдинов атындағы әскери колледжге;

- Кеңес Одағының Батыры Сабыр Рахымов атындағы Шымкент республикалық «Жас ұлан» мектебін -  Сабыр Рахымов атындағы әскери колледжіне;

- Ішкі істер министрлігі Қылмыстық-атқару жүйесі комитетінің Оқу орталығын -  Ішкі істер министрлігінің Оқу орталығына;

- Электр энергиясы нарығының қазақстандық операторы –   Электр энергиясы мен қуаты нарығының қазақстандық операторы деген  қазақ тіліндегі толық атауға көшті 

Айта кетейік, Адамның үйлесімді дамуы ұлттық институты бұған дейін «Өзін-өзі тану» пәні бойынша мұғалімдер «біліктілігін арттыра алатын» мекеме ретінде жарияланған болатын, оның да авторы Сара Назарбаева.

«Адамгершілік-рухани құндылықтарды жаңғырту жобасы» ретінде белгіленген пән бұған дейін Қазақстан мектептері үшін міндетті пәндер тізімінен шығарылған болатын.