Онлайн түрде 60-тан астам нотариалды куәландырылған сенімхаттары берілді

Қазақстанда нотариалды куәландырылған сенімхаттар беру онлайн қызметі іске қосылғаннан кейінгі алғашқы екі күнде 60-тан астам адам бұл қызметті пайдаланып үлгерді.

Қазақстандықтардың өмірін жеңілдетуге арналған жаңа «цифрлық» бастамалардың жағдайы Үкіметте өткен жиында талқыланды. Мәселен, биыл республикада мемлекеттік қызметтерді онлайн форматқа көшіру арқылы азаматтардың іскерлік және тұрмыстық мәселелерін шешуді жеңілдететін 66 «цифрлық» бастаманың пулы жүзеге асырылуда.

Ол үшін тек смартфон және оған орнатылған eGov Mobile қолданбасы қажет. Сонымен, екі күн бұрын нотариалды куәландырылған сенімхаттар беру қызметі іске қосылды.

«Банктер бұл қызметке қызығушылық танытуда. Қазір біз техникалық жағынан жетілдіруге жұмыс істеп жатырмыз. Біздің есептеуіміз бойынша, бір айдың ішінде екінші деңгейлі банктердің мобильді қосымшаларында «онлайн нотариус» қызметі пайда болуы мүмкін. Біз нотариустармен және азаматтармен де кері байланыс жүргіземіз, қазірдің өзінде алғашқы оң пікірлерді алып жатырмыз», - деді Әділет вице-министрі Бекболат Молдабеков.

Жиында Ішкі істер министрлігі де 8 «цифрлық» бастаманы жүзеге асырып жатқаны айтылды. Оның ішінде: жалған нөмірлерден келетін қоңырауларды блоктау (34 миллион қоңырау бұғатталды), автокөліктерді онлайн қайта тіркеу (қызметті 3,7 миллион азамат пайдаланды), жүргізуші куәлігін онлайн ауыстыру (қызметті 122 мың азамат алды) іске қосылды.

Қазіргі уақытта жоспарланған «цифрлық» бастамалардың 41-і толық немесе пилоттық режимде азаматтарға қолжетімді.