Онлайн оқу: Түркістанда ноутбук сатып алу кезінде 2,5 млрд қолды болды

Түркістан облысында қашықтықтан оқытуды ноутбукпен қамтамасыз ету кезінде 2,5 млрд теңгеден астам қаражат ұрланған.

Мұндай ақпаратпен Түркістан облысының қаржылық мониторинг агенттігі бөлісті. «МТ-Сервис» ЖШС басшысы мен облыс әкімдігінің лауазымды тұлғалары бюджет қаражатын жымқыру фактісі бойынша күдікке ілінді. Қазіргі таңда қылмыстық іс тергеліп жатыр.

«Қазақстан Республикасының білім мен ғылымды дамытудың 2020-2025 жылдарға арналған» бағдарламасы аясында мемлекеттен коронавирустық пандемия кезінде мектеп оқушыларын қашықтықтан оқыту үшін ноутбук сатып алуға қаражат бөлінді.

«МТ-Сервис» ЖШС директоры Түркістан облысы әкімдігімен жалпы сомасы 3,4 млрд теңгеден астам 21 мың ноутбук жеткізу туралы келісімге қол қойған. 2,5 млрд теңгеге бағаланған тауар тапсырыс берушінің техникалық талаптарына сәйкес келмеген.

«Қазіргі уақытта кәсіпорын директоры Қылмыстық іс жүргізу кодексінің 128-бабына сәйкес қамауға алынып, тергеу соты оған қатысты «қамауда ұстау» түріндегі бұлтартпау шарасын қолданды. Сотқа дейінгі тергеу жалғасуда» делінген ҚР Қаржылық мониторинг агенттігінің баспасөз қызметі.

Еске салсақ, пандемия кезінде әлем елдерінің оқушылары мен студенттері қашықтықтан оқыды. Қазақстанда білім беру ұйымдары мектеп оқушылары үшін 220 мыңнан астам компьютерлік техника сатып алды.