«Оңтүстік» индустриалды аймағындағы өрт сөндірілді

Шымкенттің Еңбекші ауданында қағаз қалдықтарын  өңдейтін зауыт аумағында өрт шықты.

Өрт туралы хабарлама 101 пультіне сағат 11:00 шамасында түскен.

ҚР Төтенше жағдайлар министрлігінің хабарлауынша, бірінші келген өрт сөндіру бөлімшелері өрттің қағаз қалдықтарын өңдейтін «Бупром» ЖШС аумағындағы «Оңтүстік» өндірістік аймағында болғанын анықтады.

«Жалпы ауданы, алдын ала мәлімет бойынша, 60х20 шаршы метрді құрайтын жеке цех өртенді. Бұл автономды жылытуы бар бір қабатты ғимарат. Ішінде үш тонна қағаз қалдықтары болған, картон қалдықтары өртенген. Өрт аумағы 200 шаршы метрді құрады» деді министрлік.

12:37-де өрт оқшауланып, 13:18-де жойылды. Оқиға салдарынан ешкім зардап шеккен жоқ.

Өртті сөндіруге жеке құрамның 52 адамы Шымкент қаласы Төтенше жағдайлар департаменті Өрт сөндіру және авариялық-құтқару жұмыстары қызметінің 14  техникасы жұмылдырылды.