Қонаев қаласының Бас жоспары қабылданды

Алматы облысындағы Қонаев қаласының Бас жоспары қабылданды. Бас жоспардың негізгі мақсаты –  оның барлық элементін өзара байланыстыра отырып, өнеркәсіптік-коммуналдық және рекреациялық аймақтарды ұтымды бөліп, жайлы және қауіпсіз тіршілік ортасын құру. 

Жоспарда қаланың перспективалық шекарасына қосылатын елді мекендер мен тұрғын үй кешендері де ескеріледі. Жоспарды іске асырудың есептік кезеңі 2050 жылға дейін жалғасады. 

«Қонаев қаласының авиация, теміржол, жол және су көлігін қолданудағы көлік-логистикалық жүйесінің мультимодальдығы оны Алматы облысындағы орталық көлік-логистикалық хабқа айналдырмақ. Жасыл электр энергиясын өндіру көздері – Қонаев қаласының индустриялық-инновациялық дамуының маңызды аспектісі. Жоспарды іске асыру кезінде жалпы ауданы 2 538,2 мың м2 жаңа тұрғын үй салынбақ. Жоспар аясында мектепке дейінгі және жалпы білім беретін мекемелер  санын екі есе көбейту көзделіп отыр» деп жазылған хабарламада.