Олжас Сүлейменовтың Алматы атауына қатысты сұхбаты сатылымнан алынды

Алматыда «Алматы ақшамы» газетінің мерекелік таралымы сатылымнан алынды.

Бұл туралы Orda.kz хабарлады.

- Бізде басып шығару кезінде қате кетті, сондықтан оны сатылымнан алып тастадық. Бас директор осындай нұсқау берді. Ол жерде техникалық қателіктер болды, - деп түсіндірді «Алматы ақшамы» газетінің коммерциялық директоры Қуаныш Дусқалиев.

Газетпен бірге Олжас Сүлейменовтың «Алматы ақшамы» газетіне берген сұхбаты сайттан да жоғалып кетті. Оның себебін сұрағанда Дусқалиев «мұндай сұрақ қоюға ешкімнің құқығы жоқ» екенін айтты.

«Алматы ақшамы» газеті бас редакторының орынбасары Михаил Буренков бұған дейін «Интерфакс-Қазақстан» агенттігіне мерекелік нөмірінде белгілі ақын Олжас Сүлейменовпен сұхбат болғаны туралы айтқан. Онда ақын Алматының атын «Алма-Ата» етіп қайтаруға қатысты пікірімен бөліскен.

Айта кетсек, Олжас Сүлейменовпен сұхбаты «Вечерний Алматы» сайтынан да жоғалып кеткен. Бірақ мақаланы Kazakhstan Today ақпараттық агенттігі қайта көшіріп, үлгерген.

Еске салсақ, белгілі қазақстандық ақын, жазушы және қоғам қайраткері Олжас Сүлейменов Алматының атын өзгерту туралы ойымен бірнеше рет бөліскен.

2019 жылы Сүлейменов президент Қасым-Жомарт Тоқаевтың қазіргі Алматының атын ескіше Алма-Ата деп атауды өзгертуді қолдағанын айтқан.

Ақынның сөзіне Тоқаевтың кеңесшісі Олжас Құдайбергенов былай деп жауап берді: «Қаланың қазақша тарихи атауы - Алматы. Осымен нүктесі қойылсын», «қазір елде қалалардың атауын өзгертуден басқа да мәселелер бар».

Сүлейменов сонымен қатар Тоқаевтың «бұл бастаманы қолдағанын, бірақ оны халықтың өзі шешетінін айтты» деп қосқан болатын.

Авторы: Кристина Думанова

Аударған: Айнура Дарибаева