Олжас Бектенов Қожа Ахмет Ясауи кесенесінің тарихи келбетін сақтау маңызды екенін айтты

Қазақстан Республикасының Премьер-Министрі Олжас Бектенов Түркістан облысына іс-сапармен барып қайтты. Онда ол Қожа Ахмет Ясауи кесенесінің тарихи келбетін сақтау маңыздылығын атап өтті, деп хабарлайды Orda.kz порталы.

Қожа Ахмет Ясауи кесенесі – Түркістанның сәулет-тарихи кешені. Жыл сайын кесенеге 1 млн адам келеді. Ал оның тиісті жай-күйін сақтау жөніндегі жұмыстар табиғи жағдайлар әсеріне байланысты және бірегей сәулет ескерткіші мен ЮНЕСКО-ның дүниежүзілік мұра нысанының сақталуын қамтамасыз етуге бағытталған.

Кесенеге күрделі жөндеу жұмыстары былтырдан бастап жасалып келеді. Қазір кесенеде климаттық факторларды өлшейтін датчиктер орнатылған.

Жөндеу жұмыстары әлі де жалғасын тауып жатыр. Премьер ескерткішті сақтау бойынша жүргізіліп жатқан жұмыстардың маңызды екенін атап өтті.

«Қожа Ахмет Ясауи кесенесі – тек қазақ халқының ғана емес, бүкіл адамзаттың асыл мұрасы. Мемлекет басшысы кесененің тарихи келбетін сақтауға қатысты тапсырма берді. Бұл – біздің ортақ міндетіміз. Кесененің жай-күйін ерекше бақылауда ұстау қажет», — деді Олжас Бектенов. Премьер-Министр Үкімет тарапынан жүргізіліп жатқан жұмыстарға барлық қолдау шаралары көрсетілетінін атап өтті.