Олжас Бектенов Ашхабадта өткен ТМД үкімет басшыларының отырысына қатысты

Қазақстан Республикасының Премьер-Министрі Олжас Бектенов Түрікменстанда өтіп жатқан ТМД Үкімет басшылары кеңесінің кезекті отырысына қатысты, деп хабарлайды ҚР Үкіметінің баспасөз қызметіне сілтеме жасап Orda.kz.       

Ашхабадқа келген Олжас Бектеновті Түрікменстан президенті Сердар Бердімұхамедов қабылдады. Қазақстан Республикасының Үкімет басшысы Президент Қасым-Жомарт Тоқаевтың ыстық лебізін жеткізді. Әңгімелесу барысында өзара құрметке негізделген екіжақты қарым-қатынастардың жоғары деңгейі атап өтілді. 

Екі ел арасындағы тауар айналымы бір жыл ішінде 28 пайызға өсіп, 563 миллион доллар болды. Ағымдағы жылдың үш айының қорытындысы бойынша өзара тауар айналымы 105 миллион доллар болды, сондай-ақ газ саласындағы ынтымақтастық мәселелері ауыл шаруашылығы саласындағы бірлескен қазақ-түрікмен жобалары талқыланды.

ТМД отырысында Достастықтағы өзара іс-қимылдың өзекті мәселелері бойынша пікір алмасу болды. Кездесу нәтижесінде түрлі салалардағы интеграциялық байланыстарды одан әрі дамытуға және нығайтуға бағытталған құжаттар пакеті қабылданды.

Үкімет басшылары экономикалық ынтымақтастық аспектілерін талқылады. Көлік, энергетика, химия өнеркәсібі, экология және қауіпті қалдықтармен жұмыс істеу, денсаулық сақтау, зияткерлік меншік саласындағы құқық бұзушылықтармен күрес және басқалар салаларындағы ынтымақтастықты дамыту бойынша бірқатар мәселелер қаралды.