Өлтіріп, мәйітін Жайыққа тастаған бойжеткеннің денесін іздеу тоқтатылды

1,5 ай бұрын жоғалған 23 жастағы Яна Легкодомованың денесін іздестіру жұмыстары тоқтатылды, деп хабарлайды Orda.kz. 

2001 жылы туған Яна Легкодомованы 2024 жылғы 22 қазаннан бастап 4 желтоқсанға дейін іздеу жұмыстары жүргізілген. Іздеу жұмыстары тоқтатылғаны жайлы Атырау облысының ТЖД хабарлады.

«Іздеу операциясы аясында жағалау мұқият қаралып, Жайық өзенінің түбін сүзу әдісімен 4500 шаршы метрден астам аумақ тексерілді. Төтенше жағдайлар қызметкерлері Полиция департаменті көрсеткен орыннан бастап ағыс бойымен 30 шақырым қашықтықтағы акваторияда іздестіру-құтқару жұмыстарын жүргізді. Сонымен қатар, түбін егжей-тегжейлі зерттеу үшін құтқарушылар сүңгуір-құтқару жұмыстарын жүргізіп, эхолот қолданылды»,  деп айтылған хабарламада.

Іздеу жұмыстарының жүргізілгеніне қарамастан нәтиже болмаған. Сонымен қатар, күннің суытуы су көліктерінің техникалық жай-күйіне әсер ететінін ескере отырып, 2024 жылы 4 желтоқсаннан бастап іздеу жұмыстары тоқтатылды.

НеМолчи қорының ақпаратына сәйкес, Яна 18-19 қазанға қараған түні жоғалып кетті. Тергеу мәліметтері бойынша және қолда бар дәлелдерді ескере отырып, қызды 24 және 25 жастағы жігіттер өлтірді. Дәлел ретінде 12 қазаннан бастап Янаның жүргізген күнделігі бола алады, күнделігінде бір жігіт туралы жазған. Күдіктілер өлтіргенін мойындап отыр.