«Олимпиаданың ашылу күнінде ереуілге шығамыз»: Париж әуежайлары қызметкерлері мәлімдеме жасады

Париж әуежайлары қызметкерлері Олимпиаданың салтанатты ашылу күнінде, 26 шілдеде ереуілге шықпақ.

Бұл туралы олардың мүдделерін қорғайтын  Force Ouvrière кәсіподағы хабарлады. 

Кәсіподақ әуежай қызметкерлерінің сыйақыларын 300 евродан 1 000 евроға дейін арттыруды талап етіп отыр. RMC Sport мәліметтері бойынша, өткен аптада басшылық қол қойылған еңбекақы төлеу туралы келісім тек «жартылай және аз ғана ілгерілеуге» әкелген соң, олар ереуіл өткізуге бел байлады.

Ереуіл жұма күні жергілікті уақыт бойынша таңғы 5:00-ден сенбі күні таңғы 7:00-ге дейін жалғасады. Егер қызметкерлер ереуілге шықса, «Руасси – Шарль-де-Голль», «Орли» және Бове әуежайларындағы қозғалыс тоқтап қалады. Авиакомпаниялар ереуіл туралы алдын ала ескертіліп, ұшу кестесін түзетуі мүмкін.

Бұған дейін Олимпиада кезінде Париж әуежайлары арқылы тәулігіне 350 000 адам өтетіні хабарланған болатын.