Олимпиададан құр қол қайтқан спортшылар шағымдарын айтты

Олимпиададан құр қол қайтқан ұлттық құрама спортшылары жаттығуға жағдай жасалмағанын айтты. Бейжіңдегі жарысқа ту ұстап барған Абзал Әжіғалиев спортшыларды ғана кінәлау негізсіз екенін жеткізді.

- Қазір көбі жекеменшікте. Сол үшін бізге жаттығатын уақыт жетпей жатыр. Олимпиаданың алдында жақсы көңіл бөледі. Бірақ бізге Олимпиада алдында төрт жыл бойы дайындалу керек. Төрт жыл бізге өз көлемінде осы мұзды қолданатындай уақыт берілсе екен деп ойлаймын. Әлем кубоктары, әлем чемпионаттары, Универсиада, Азиада ойындарында сол жарыстарды, біздің жарыстарымызды афишаға шығарса деп ойлаймын. Өйткені осы Олимпиадада адамдар осы шорт-тректі жаңа ғана көріп-біліп жатыр. Бұрын көрмеген, қандай спорт екенін білмейді, - деді спортшы Абзал Әжіғалиев телеарнға берген сұхбатында.

ҚР Мәдениет және спорт вице-министрі Серік Жарасбаев расында мемлекет қаражатына салынған спорт нысандарының жекеменшікке өтіп кеткенін мойындады.

- Абзал жазған мәселелердің бір бөлігі шындық. Оны мойындауымыз керек. Бүгінде мұзы бар ірі нысандардың көбі жекеменшікке берілген. Сол себепті ұлттық құраманың дайындық жасау жағынан проблемалар бар. Дегенмен мәдениет және спорт министрлігі де, Ұлттық Олимпиада комитеті де, федерация да осы проблеманы шешуге тырысып жатыр. Шынында, олар бір ай қалғанда «Алауда» жиналған болатын. Себебі пандемияға байланысты спортшылардың барлығы карантинде болды, - деді ол.