Олимпиада ойындары қазақстандықтар үшін қолжетімді болады

ХХХІІ жазғы Олимпиада ойындары Qazaqstan, Qazsport және Хабар телеарналарында тікелей эфирде көрсетілетін болады.

Бұл туралы Orda.kz ҚР телерадиокорпорациясының баспасөз қызметіне сілтеме жасап хабарлады.

Dentsu Inc. жапондық компаниясымен келіссөздер өтті. Нәтижесінде қазақстандық арналар трансляцияға қол жеткізді.

– Qazaqstan, Qazsport және Хабар телеарналарының 2020 жылғы Токиодағы жазғы Олимпиада ойындары мен 2022 жылы Пекиндегі қысқы Олимпиада ойындарын қолайлы бағамен көрсету құқығын иеленуі туралы келісім болды, - деп телерадио корпорациясы хабарлады.

Олимпиаданың ашылу салтанаты Нұр-Сұлтан уақытымен 17:00-де басталады.

Телеарналардағы олимпиадалық жарыстардың кестесі кейін жарияланады.

Еске салсақ, 19 шілдеде Qazaqstan мен Хабар телеарналары хабар тарату лицензиясының бағасында келісе алмағаны белгілі болды. «РТРК Қазақстан» АҚ мәліметтері бойынша, құқық иеленуші бағаны 2016 және 2018 жылдармен салыстырғанда 123%-ға жоғары белгілеген.

20 шілдеде ҚР Ақпарат және қоғамдық даму министрлігі Олимпиада ойындарын көрсету құқығын сатып алу туралы келіссөздер жалғасуда деп мәлімдеді. Министрліктің хабарлауынша, соңғы коммерциялық ұсыныс бағасы 7,5 млн доллар болды.