Олимпиада-2020: боксшы Серік Теміржанов қарсыласын екі рет нокдаунға жіберді

Токио Олимпиадасында кезекті жарыс күні Қазақстан командасының өкілі Серік Теміржанов шаршы алаңға шықты.  

57 келіге дейінгі салмақ дәрежесінде сынға түскен Серік Теміржанов алғашқы айналымда венгриялық Роланд Галошпен кездескен болатын. Аталған кездесуде Теміржанов қарсыласын айқын басымдықпен ұтты.

Ол жекпе-жек барысында екі рет есеп ашып, қарсыласын нокдаунға жіберді. Төрешілер де Серіктің айқын басымдығын бірауыздан мойындады. Бес төрешінің барлығы да жеңісті Теміржановқа берді.

Теміржанов қазақстандық боксшылардың Токио Олимпиадасындағы жеңісті жолын бастап берді.

Айта кетейік, Серік Теміржанов  Павлодар қаласындағы бокс мектебінің түлегі. Ол Иорданияның Амман қаласында өткен Азия аймақтық іріктеу турнирінде Олимпиада жолдамасынының  иегері. Қазақстан чемпионы, халықаралық турнирлердің жеңімпазы.

Еске салсақ, Токиода Қазақстанның ерлер құрамасын сегіз спортшы қорғайды. Сондай-ақ, Олимпиада жүлделері үшін: Сәкен Бибосынов (52 келіге дейін), Закир Сафиуллин (63 келіге дейін), Абылайхан Жүсіпов (69 келіге дейін), Әбілхан Аманқұл (75 келіге дейін), Бекзад Нұрдәулетов (81 келіге дейін), Василий Левит (91 келіге дейін) және Қамшыбек Күнқабаев (91 келіден жоғары) салмақта күш сынасады.