Олигарх Александр Машкевичке ота жасалды – БАҚ

ERG компаниясы директорлар кеңесінің төрағасы Александр Машкевичтің миына жуырда күрделі ота жасалды.

Бұл туралы Nege.kz хабарлайды.

«Миллиардердің миынан кінәрат анықталғанына біраз болған. Сол себепті ота да шұғыл емес, жоспарлы түрде өткен. Дәрігерлер отаның қай түріне де жауапты қарайды ғой. Ал егер ота адамның басына жасалса, оның қиындығы еселене түсері анық. Дегенмен, бізге жеткен дерекке қарағанда, «миллиардердің миындағы ісікті алып тастау» отасы сәтті өткенге ұқсайды. Сондықтан да «Машкевичтің хәлі мүшкіл екен» деген пікір жаңсақ болуы мүмкін» делінген хабарламада.

Жалпы, қалталылар жиі барып емделетін екі ел бар. Оның бірі – Израиль, екіншісі – Германия. Дереккөздің ақпарына сенсек, Машкевич отаны Германияның Мюнхен қаласында жасатқан, делінген хабарламада.

Портал тілшісінің хабарлауынша, Мюнхенде әлемдік деңгейдегі клиникалардың бірі Рехтс дер Изар Мюнхен Университет клиникасы. Онкологиялық ауруларды емдеудің жаңа тәсілдеріне машықтанған бұл клиника дүниежүзі бойынша аса беделді зерттеу орталықтарының бірі саналады. Миллиардер Машкевичтің басына осы Рехтс дер Изар клиникасында ота жасалған болуы әбден мүмкін.

Бұл туралы әзірге ресми дерек жоқ.