Ольга Рыпакова: біздің костюмдеріміз шетелдіктерге қатты ұнады

ҚР Еңбек сіңірген спорт шебері Ольга Рыпакова Токиодағы Олимпиаданың ашылу салтанатынан алған әсері туралы айтты. Оның айтуынша, шетелдіктерге қазақстан құрамасының костюмдері қатты  ұнаған.

Спорттық костюмдер Ұлттық Олимпиада комитетінің арнайы тапсырысымен тігілді. Эскиздерді әзірлеуге Әбілхан Қастеев атындағы Мемлекеттік өнер мұражайының мамандары қатысты. Костюмдердің  дизайнын жасап, тігіп шыққан алматылық модельер - Виолетта Иванова.

Еске салсақ, кеше 40 қазақстандық спортшы мен бес жаттықтырушы Олимпиада ойындарының ресми ашылу рәсіміне қатысты.

— Біздің костюмдерімізге ерекше ықылас бар екенін байқадық. Ашылу салтанаты өткен стадионда, басқа елдерден келген спортшылар суретке түссек деп өтініш жасап жатты. Бұл, әрине, өз еліміз үшін өте мақтанарлық жайт. Қазақстандықтар бүгін жарқырап шықты деп айта аламын. Көңіл-күйіміз тамаша, - деді  Ольга Рыпакова.

Естеріңізга салсақ, бүгін Жапонияның Токио қаласында Жазғы Олимпиаданың екінші күні өтуде.