Олег Крук Павлодар облысы әкімі қызметін уақытша атқарады

Олег Крук Павлодар облысы әкімінің міндетін атқарушы болып тағайындалды.

Бұл туралы Ақорда хабарлайды.

Ол 2020 жылдың қаңтарынан бері облыс әкімдігін басқарған Әбілқайыр Ысқақовтың орнына келді.

Олег Крук бұрын Павлодар облысы әкімінің бірінші орынбасары қызметін атқарған. Павлодар индустриалды институтын «Өнеркәсіптік жылу энергетикасы инженері» мамандығы бойынша бітірген.

Еңбек жолын Павлодар 3-ЖЭО қазандық цехының инженер-тексеруші, инженер-технологы болып бастаған.

Сондай-ақ ол «Павлодарэнерго» мекемесінің жылу желілерінің директоры болды, Павлодар облысының энергетика және коммуналдық шаруашылық басқармасын басқарды. 2008 жылы Павлодар қаласы әкімінің орынбасары болып тағайындалды. Екі жыл бойы «Қазэнергокабель» АҚ атқарушы директоры қызметін атқарса, 2021 жылы Павлодар облысы әкімінің бірінші орынбасары болды.