«Ол - үй сыпырушы, мен - күзетші»: Ақтөбеде жесір әйелді ұрды деп айыпталған депутат пікір білдірді

Байғанин аудандық мәслихатының депутаты Болат Аяповтың үстінен қылмыстық іс қозғалды. Депутатқа қатысты «Ұрып-соғу» бабымен тергеу жүріп жатыр, деп хабарлайды Orda.kz.

Ақтөбе облысы Байғанин ауданы Көлтабан селолық округінің тұрғыны Күнсұлу Намазбаева полицияға арыз түсірді. Ол аудандық мәслихаттың депутаты Болат Аяповтан қысым көргенін айтты. Жәбірленушінің сөзінше, депутат себепсіз ұрып, балағаттаған және елден көшіремін деп қорқытқан. 

Депутаттан зәбір көрдім деген әйел – президенттен, бас прокурордан, ІІМ-нен көмек сұрады. 
Ақтөбе облысының ПД аталған дерек бойынша Байғанин ауданы полиция бөлімімен ҚК 109 бабымен қылмыстық іс қозғалғанын хабарлады. Қазір тергеу амалдары жүріп жатыр. 

Басы дауға қалған депутаттың өзі жағдайды жала деп түсіндіреді. Айтуынша, үстінен арыз жазған әйелмен ауылдағы мемлекеттік балабақшада бірге жұмыс істейді. Әйел – үй сыпырушы, депутат – күзетші. 

Байғанин аудандық мәслихаттың сегізінші шақырылымының депутаты Болат Аяпов үстінен іс қозғалғаннан кейін адвокатқа жүгінген. 

«Мен жаңа ғана тергеуге барып келдім. Әзірге ештеңе айта алмаймын. Тергеу барысында анықталады. Бұл жала. Қазір қан қысымым көтеріліп, ауырып тұрмын. Қорғаушым бар», – деді Болат Аяпов.

Автор: Ардақ Ерубаева