«Ол бала оқшалауға жатпайды»: Лифтте баланы пышақтаған жасөспірім туралы денсаулық сақтау министрлігі

Денсаулық сақтау вице-министрі Ержан Нұрлыбаев Астанада лифт ішінде баланы пышақтаған жасөспірімге қатысты пікір білдірді, деп хабарлайды Orda.kz.  

Оның айтуынша, министрлік қызметтік тергеу жүргізіп жатыр.

«Психикалық денсаулық қызметтері барлық материалдарға сараптама жүргізіп жатыр. Бір-екі аптаның ішінде барлық материалдар қолымызда болады. Сол кезде толық ақпарат бере аламыз. Психикалық денсаулығына байланысты мүгедектігі бар балалардың қамқоршыларына қойылатын белгілі бір талаптар бар. Бұл талаптар олардың балаларды үнемі бақылауда ұстауын қарастырады. Мұндай балалар тұрақты қадағалауда болуы керек»,– деді Нұрлыбаев мәжіліс дәлізінде.

Ол дәрігерлер тарапынан ешқандай заңбұзушылық болмағанын атап өтті. Оның айтуынша, шизофрениямен ауыратын жасөспірімге тиімді ем жүргізілген. 

«Тағайындалған емдеу өз нәтижесін берді. Бұл баланың бірнеше рет ауруханаға жатқызылғаны расталды. Толық әрі нақты ақпаратты қызметтік тексеру аяқталған соң беремін. Ол (күдікті – ред.) оқшаулауға жатпайды. Егер емдеу тиімді болса, ал біз оның тиімділігін бірнеше рет дәлелдедік, ол әлеуметтендіруге жатады, оқшаулауға жатпайды», – деп қосты вице-министр.

Ол болған жағдай психикалық ауытқуы бар адамдарды алалауға себеп болмауы керектігін атап өтті.