Оқушыларды қазақ тілінен жалпы емтихан күтіп тұр

Қазақстанның оқу-ағарту министрі Ғани Бейсембаев биыл оқушылардың бәрі қазақ тілінен емтихан тапсыратынын айтты, деп хабарлайды Orda.kz порталы.

Үкіметте өткен брифинг барысында Ғани Бейсембаевтан 5-9 сынып оқушылары тапсыратын емтихан жөнінде сұрақ қойылды. Атап айтқанда, министр емтихан тапсыра алмайтын оқушыларға қандай шара қабылданады деген сұрақ қойылды.

Министрдің айтуынша, емтихандар қазақ тілін оқыту мен білімнің сапасын арттыру үшін енгізілген. Министр халық тарапынан ведомство атына көп сын келіп түсетінін, өйткені балалар қазақ тілін 11 жыл бойы оқығанымен, мектеп қабырғасынан мемлекеттік тілді білмей кететінін атап өтті.

«Енді көрейік, негізінен, мұны бірінші рет енгіземіз. Қазір үлкен дайындық жүріп жатыр. Балалар да, мұғалімдер де үлкен қызығушылық танытуда. Сондықтан осы емтихандар аяқталғаннан кейін ғана ақпарат бере аламыз», - деді министр.

«Емтихан тапсыра алмайтын оқушыларды қандай да бір жаза күтіп тұр ма?» деген сұраққа министр «тест баланы пәнді жақсы оқытуға ынталандыруы керек» деп жауап берді. Яғни, ондай балаларға еш жаза қарастырылмаған.

«Министрліктің ұстанымы жазалау емес, бұл тіл үйренуге ынталандыруға көбірек бағытталған. Жаза болмауы керек», - деді министр.