«Қойдың нәжісіне шомылдырды». Мән-жай анықталып жатыр

Әлеуметтік желілерде емші баланы жануардың нәжісіне шомылдырып «емдеген».

Бұл туралы Orda.kz хабарлады.

Facebook қолданушысы Әйгерім Төреқұлова баланың суретін жариялап, халық емшілеріне наразылығын білдірді.

Әйгерімнің айтуынша, мұндай емдік шараны желіде 180 мыңдық аудиториясы бар келіншек жүзеге асырған.

Жазба авторы сонымен қатар әлеуметтік желілердегі емшілер балаларды көкжөтелден жылы көгершін қанымен емдеуге кеңес беретініне шағымданды.

Балалардың құқықтарын қорғау комитеті бұл іс бойынша тергеу жүргізу үшін Ішкі істер министрлігіне жүгінгендерін хабарлады. Департамент емшілердің жалған емдеуі балалардың физикалық және психикалық денсаулығына зиян келтіретінін атап көрсетті.

– Өкінішке орай, ата-аналардың сенімсіздігі ауыр зардаптарға әкеледі. Балаларының денсаулығына, физикалық, психикалық, рухани және адамгершілік дамуына қамқорлық жасау ата-аналардың міндеті. Ата-аналар (заңды өкілдер) 127 бап бойынша әкімшілік жауапкершілікке тартылатынын білуі керек.

Сондай-ақ, баланың өмірі мен денсаулығының қауіпсіздігін қамтамасыз етпегені үшін оның қамқоршысы Қылмыстық кодекстің 141-бабы бойынша жауапқа тартылады, - деді Балалар құқықтарын қорғау комитеті.