Өгей әкесі үш баласын азаптағаны үшін төрт жылға сотталды

Талас аудандық сотында бір ер адам кәмелетке толмаған үш баланы азаптап келгені үшін кінәлі деп танылып, төрт жылға сотталды, деп хабарлайды Orda.kz.

 Т. есімді азаматқа қылмыстық кодекстің 110-бабы 2-бөлімі 1,2-тармақ бойынша айып тағылды.

2019 жылдан 2025 жылға дейін Т. ауылдағы шаруашылықта 2008 жылы туған өгей балаларына күш көрсетіп, азаптаған. 2025 жылдың сәуір айынан бастап ол жұбайының 2015 жылы туған ұлына да қорлық көрсеткен.

Сот анықтаған деректерге қарасақ, Т. балаларды қоғамнан оқшаулап, мектепке баруына кедергі жасап, білім алуына бөгет болған. Оларды еңбекке мәжбүрлеген және тамақ бермеген. Балалардың еңбегінен түскен табысты ол өз мүддесіне пайдаланған.

Оның кінәсі куәгерлердің, соның ішінде зардап шеккендердің туыстарының куәліктерімен және басқа да материалдармен дәлелденген.

Қылмыстық кодекстің 110-бабы бойынша мұндай қылмыс үшін 4-тен 7 жылға дейін бас бостандығынан айыру жазасы қарастырылған. Сот жеңілдететін немесе ауырлататын жағдайларды анықтамаған.

Сот Т.-ны кінәлі деп танып, төрт жылға бас бостандығынан айырды. Шешім әлі заңды күшіне енген жоқ.