«Оған тіпті қағаз да кеткен жоқ» - Қостанай облысының әкімі Қазақстан мен Ресей форумына жұмсалған қаражат туралы айтты.

Қостанай облысының әкімі Құмар Ақсақаловтың айтуынша, Қазақстан мен Ресейдің өңіраралық ынтымақтастық форумына дайындық жұмыстарына бөлінген қаржы Қостанайды абаттандыруға жұмсалған, деп хабарлайды Orda.kz ақпарат агенттігі.

Форум қарсаңында оны дайындауға 13 миллиард теңгеге жуық қаржы бөлінгені хабарланды. Ақсақаловтың айтуынша, бұл ақша Қостанай қаласының қалалық инфрақұрылымын жақсартуға және алдағы уақытта азаматтар пайдалана алатын нысандарды жөндеуге жұмсалған.

«Қостанайда 69 көшені жөндедік, жарықтандыруды ретке келтірдік. Осы қаражатты қоса алғанда бұның бәрі қаланың дамуына жұмсалды. Келесі жылы бұл жұмыс жалғасады деп сендіремін», - деді әкім.

Ал форумның өзіне жұмсалған қаражатқа келетін болсақ, Ақсақаловтың айтуынша, облыс оған мүлде қаржы жұмсамаған.

«Адамдар ұшақпен ұшты, қонақүйге тіркелді, ақшасын жұмсады. Тіпті материалдарды басып шығаруға да қағаз жұмсамадық, барлығын WhatsApp арқылы жібердік», - дейді әкім.

Естеріңізге сала кетейік, 9 қарашада Қостанайда Қазақстан мен Ресейдің өңіраралық ынтымақтастығы форумы өткен болатын. Бастапқыда Қасым-Жомарт Тоқаев пен Владимир Путин қатысады деп болжанған, бірақ олар Астанадан бейнебайланыс арқылы қатысушыларға үндеумен шектелді.