Озерсктен Семейге 50 шақты адам эвакуацияланды

Абай облысындағы алапат өрт салдарынан Озерск ауылдық округіне қарасты ауылдардан Семейге 50-ге жуық адам эвакуацияланды.

Алапат табиғи өрт салдарынан Озерск ауылдық округіне қарасты үш ауылдан Семей қаласына 50-ге жуық адам эвакуацияланды, оның ішінде 1-14 жас аралығындағы 13 бала бар. Бұл туралы ҚР Балалар құқығын қорғау комитеті хабарлады.

Қазіргі уақытта балалар мен олардың ата-аналары колледж жатақханаларына орналастырылды. Адамдар барлық қажетті заттармен қамтамасыз етілген. Олармен кәсіби психологтар жұмыс істеуде.

Отбасылар үшін биологиялық орталық пен кинотеатрларға бару арқылы ойын-сауық шаралары ұйымдастырылды.

Жетім балалар мен ата-анасының қамқорлығынсыз қалған балаларға арналған ұйымдар, балалар лагерлері зардап шеккен жоқ.

Балаларды одан әрі орналастыру комитеттің бақылауында, оларға барлық қажетті көмек көрсетіледі.

Абай облысындағы өртті қалай ауыздықтап жатқанын бұған дейін де хабарлаған болатынбыз.