Өзбекстанда ыстықты түсіретін дәріден көз жұмғандар саны 20-ға жетті

Өзбекстанда екі аптаның ішінде 20 бала жоғары дене қызуына  қарсы дәріні қолдану салдарынан көз жұмды.

Тағы бір 2,5 жасар бала  қызуды басатын ДОК-1 Макс препаратын қолданудан қайтыс болды. Kun.uz сайтының хабарлауынша,  ол  25 жастағы ананың жалғыз баласы. Ол өткен жылдың 13 желтоқсанынан бері ұлын емдеп келеді, 16 желтоқсанда сәби Республикалық жедел медициналық жәрдем ғылыми орталығының Наманган облыстық филиалына жіберілген. Ал 21 желтоқсанда бала қайтыс болды.

Наманған облыстық денсаулық сақтау басқармасының мәліметі бойынша, науқас «пневмонияның ауыр түрі, функционалдық ас қорыту бұзылысы, диспепсиялық бұзылыс, гиповолемия» диагнозымен емделген. Анасының айтуынша, үйде балаға қызуды түсіретін атышулы  дәріні берген.

Бұған дейін Өзбекстанда бірқатар өлім-жітім орын алған. Фактілер Денсаулық сақтау министрлігінің бұрынғы басшысы Бехзод Мұсаев осы дәріні қолданып қайтыс болған 18 баланың ата-анасына көңіл айтқан кезде шыға бастады. Осыдан кейін тағы екі адам өлімі белгілі болып, дене қызуын түсіретін дәрі сатылымнан алынып тасталды.