Өзбекстанда мұғалімдерді негізсіз жұмысқа тартқандарға  қылмыстық және әкімшілік жаза қолданылады

Шымкент қалалық мәслихатының VII шақырылымының депутаты Мұрат Жолдықожаев Өзбекстан президентінің қызы Саида Мирзиееваның мұғалімдерді заңсыз іс-әрекеттерге қатыстырғандарға әкімшілік, тіпті  қылмыстық жауапкершілікті енгізу туралы бастамасын қолдады.

— Менің назарым Өзбекстанда да, шетелде де кеңінен талқыланған Саида Мирзиееваның сөйлеген сөзіне аударылды. Онда ол мұғалімдерді жақтап,  мұғалімдерді негізсіз жұмысқа тартатындар үшін әкімшілік, тіпті қылмыстық жауапкершілікке тартылатынын жариялады. Өзбекстан проблеманың бар екенін мойындап, оны жою шараларын әзірлеп жатқаны білім деңгейі мен сапасын арттыру ниетінің қаншалықты маңызды екенін көрсетеді.

Бұл мәселеге Президент Шавкат Мирзиеев те Олий Мәжіліске жолдауында үлкен мән берді, мұнымен бәріміз таныс болдық. Президент келесі жылды республикада «Адамға қамқорлық және сапалы білім жылы» деп атауды ұсынды. Бұл ұстаздардың ұстанымына, олардың ар-намысы мен абыройын қорғауға тікелей қатысты, - деп жазды Жолдықожаев Facebook парақшасында.

Сонымен қатар, депутат Қазақстанда да осындай проблемалар бар екенін, сондықтан 2019 жылы «Педагог мәртебесі туралы» заң қабылданғанын атап өтті. Жолдықожаев бұл заң іс жүзінде өзін оңды дәлелдеді және Қазақстан Республикасының тәжірибесі Өзбекстан үшін пайдалы болуы мүмкін деп санайды.

Өзбекстан президенті Шавкат Мирзиеев ел парламентіне жыл сайынғы жолдауында мұғалімдердің мәртебесі, олардың ар-намысы мен абыройын қорғау туралы ережені ел Конституциясына енгізу керектігін айтты.

Айта кетейік, Өзбекстан ТМД елдерінде мұғалімдерді тікелей міндеттеріне қатысы жоқ жұмыстарға тарту үшін қылмыстық және әкімшілік жауапкершілікті енгізетін алғашқы мемлекет болады.