Өзбекстан Путин ұсынған «газ одағына» қосылудан бас тартты

Өзбекстан Путиннің Ресей, Қазақстан және Өзбекстан арасында газ одағын құру туралы идеясын қолдамады.

– Біз газ бен электр энергиясын импорттауды қандай да бір одақ арқылы емес, көрші елдермен келіссөздер жүргізу арқылы іске асырамыз. Келіссөздер өзара энергетикалық желілермен алмасу арқылы емес, коммерциялық келісімшарт, сатып алу-сату үшін ұлттық мүдделер негізінде жүргізіліп жатыр, – деп атап өтті Өзбекстанның Энергетика министрі Журабек Мырзамахмудов.

Қараша айында Қасым-Жомарт Тоқаев пен Владимир Путиннің Кремльдегі келіссөздері барысында Ресей, Қазақстан және Өзбекстан мүше болатын «үштік газ одағын» құру туралы пікір алмасқан еді.

– Кремльде өткен Қазақстан мен Ресей президенттерінің келіссөзі барысында Қазақстан мен Өзбекстан территориясы арқылы Ресей газын тасымалдау жұмыстарын үйлестіру мақсатында құрамына Ресей, Қазақстан, Өзбекстан кіретін үштік газ одағын құру мәселесі қарастырылғанын атап өткен жөн. Қасым-Жомарт Тоқаев пен Владимир Путин барлық тараптың мүдделерін ескере отырып, осы мәселенің ұтымды шешімін табу үшін үш ел сарапшыларының қатысуымен егжей-тегжейлі келіссөз жүргізу қажет деп санайды, – деп жазды президенттің баспасөз хатшысы.