Өрттен үш адамды аман алып шықан  Асқар ауруханада көз жұмды

Өрт сөндіруші Асқар Забикулиннің өмірі үшін астаналық дәрігерлер бірнеше күн күресіп, жанын сақтап қала алмады, оның артында әйелі мен екі баласы қалды.

Дәрігерлер бірнеше күн бойы өмірі үшін күрескен өрт сөндіруші Асқар Забикулин ауруханада қайтыс болды, деп хабарлады ҚР Төтенше жағдайлар министрлігі.

«Асқар 16 қарашада Астанада болған өрттен адамдарды құтқаруға ерлікпен қатысты. Төтенше жағдайлар министрлігі марқұмның туыстары мен жақындарына қайғыларына ортақтасып, көңіл айтады. Өз ісінің маманы ретіндегі жақсы естелік жүрегімізде мәңгі сақталады. Асқар жарқын тұлға, жауапты қызметкер, кәсіби күрескер, білікті маман болды. Жұмыста ол еңбексүйгіштігімен, әділдігімен және мамандығына деген сүйіспеншілігімен бағаланды» деді министрлік.

Асқардың артында әйелі мен екі баласы қалды. Төтенше жағдайлар министрлігі қаза тапқан өрт сөндірушінің отбасына жан-жақты көмек пен қолдау көрсетуге уәде беріп отыр.

Еске салайық, Забикулин зардап шеккен өрт 16 қарашада Момышұлы даңғылындағы 15 қабатты үйде болған. Өрт сөндіруші үш адамды өрттен аман алып шықты, олардың ішінде он жасар бала, 80 жастағы әже және оның 22 жастағы немересі бар.