Обухов «ГОК» ісі: Прокурор Долгалевке 12 жыл сұрады

15 қазан күні Павлодар облысында судья Құдабай Сұлтанов алқабилердің қатысуымен Қазақстандағы ең ірі кәсіпорындардың бірінің тең иесі Виктор Долгалев ісіне қатысты жиырмадан астам мәселені қарады, деп хабарлайды Orda.kz.

Сотталушыларға жер қойнауын заңсыз пайдалану, 3 трлн теңге көлемінде залал келтіру, алаяқтық және пара беру айыптары тағылған.

«Тиолайн» компаниясының тең иесі әрі Обухов тау-кен байыту комбинатының негізін қалаушы Виктор Долгалевпен бірге оның ұлы Данил Долгалев, адвокат Санат Құрманбаев және кәсіпкер Тимур Сәдуақасов та айыпталушылар орындығында отыр.

Олар өздеріне тағылған айыптарды мойындамай, жеке қорғаныс жүргізіп келеді. Сонымен қатар, сотқа ондаған өтініш берген. Көпшілігі — бұрынғы және қазіргі жоғары лауазымды тұлғаларды куәгер ретінде шақыру туралы болған. Алайда сот бұл өтініштердің ешбірін қанағаттандырған жоқ.

Прокурор Виктор Долгалевті 12 жылға бас бостандығынан айыруды, мүлкін тәркілеуді және өмір бойы қаржы саласына қатысты лауазымдарда қызмет атқару құқығынан айыруды сұрады. Сондай-ақ оған 10 жыл бойы жер қойнауын пайдалану құқығына тыйым салу ұсынылды.

Данил Долгалевке 6 жылға бас бостандығынан айыру және мүлкін тәркілеу, кәсіпкерлік қызметпен айналысуға тыйым салу жазасы сұралды. Ал Санат Құрманбаев пен Тимур Сәдуақасовқа 10 жылдық жаза тағайындау ұсынылды.

Айта кетейік, Петропавлда өткен алдыңғы сот процесінде СҚО прокуратурасы айыпталушыларға бұдан аз мерзім сұраған болатын: Виктор Долгалевке — 10 жыл, ал оның ұлына — 5,5 жыл.

Еске сала кетейік, Виктор Долгалев 2024 жылдың ақпан айында ұсталған.