Оқушының әкесін жұмысынан шығарам деген мектеп директоры жазаға тартылды

Шығыс Қазақстан облысындағы мектеп директоры педагогикалық этика нормаларын бұзғаны үшін қатаң сөгіс алды.

Әлеуметтік желілерде ШҚО Үржар ауданы Бауыржан Момышұлы атындағы орта мектебінің директоры балалармен дауыс көтеріп сөйлескен аудиожазба тарады.

Осы фактіге байланысты ШҚО білім саласындағы сапаны қамтамасыз ету департаменті тексеру жүргізді.

Әлеуметтік желілерде жарияланған қызуқанды сөздерінен кейін, келесі күні директордың кешірім сұрағаны белгілі болды.

Алайда, педагогикалық этиканың бұзылуына байланысты ШҚО әкімдігінің білім басқармасы мектеп директорын қатаң сөгіс түрінде тәртіптік жауапкершілікке тарту туралы шешім қабылдады.

ШҚО білім басқармасы педагогикалық этика нормалары мен ережелерін сақтау қажеттілігі туралы түсіндіру әңгімелерін өткізді.

«Мектептер заң жүзінде әкімдіктердің тікелей бағынысында екенін атап өтеміз, сондықтан балалар мен педагогтердің құқықтары бұзылған, сондай-ақ мұғалімдерді жұмыстан тыс міндеттерді орындауға тартқан жағдайда жергілікті білім басқармаларына немесе қажет болса ҚР білім және ғылым білім беру саласындағы сапаны қамтамасыз ету жөніндегі аумақтық департаменттерге жүгінуді сұраймыз» делінген хабарламада.

Еске салсақ, Желіде Шығыс Қазақстан облысы Үржар ауылындағы Бауыржан Момышұлы атындағы мектептің директоры Зәуре Сатыбалдинованың оқушыларға ұрсып жатқан аудиосы таралған болатын. Оқушылардың бірінің әкесі ауруханада жұмыс істейтінін естіген директор белгісіз біреуге хабарласып, әкесін жұмыстан шығару керек деп қорқытқан.