Оқушыға «қол көтерген» мұғалімнің кінәсіз екені анықталды

Мектеп ішіндегі бейнекамералар дене шынықтыру пәнінің мұғалімі оқушыға қол көтермегенін көрсетті.

Бұл туралы Orda.kz хабарлады.

Еске салсақ, желіде «Қарағандыда орта мектептердің бірінде дене шынықтыру сабағы кезінде мұғалім оқушыға қол көтеріп, оны еденде сүйреді» деген хабар пайда болған.

Жағдай бойынша Қарағанды қаласының білім бөлімі дене шынықтыру мұғаліміне қатысты қызметтік тексеру жүргізді. Тексеру нәтижесі бойынша «ұстаздың кінәсіз екені» анықталды.

 – Баланың анасы, полиция және мектеп басшылығы мектептің спортзалында орнатылған бейнекамераның жазбаларын бірге қарап шықты. Видеода зорлық-зомбылық фактілері жоқ. Бейнебақылау камерасындағы жазба дене шынықтыру мұғалімінің балаға қол көтеру фактісі болмағанын көрсетті. Баланың анасы жағдайды түсінбегенін айтып, тексерілмеген ақпаратты жария етуге асыққаны үшін кешірім сұрады. №34 мектеп ғимаратында педагогтардың, учаскелік полиция инспекторларының және 7-сынып оқушысының анасының қатысуымен құқық бұзушылықтың алдын алу бойынша кеңес өткізілді. Тексеру аяқталды, - деді Қарағанды қаласының білім бөлімі.

Дене шынықтыру мұғалімі өтірік жала жапқан оқушының ата-анасына қандай жаза қолданатыны әзірге белгісіз.