Оқ астында қалған министрлік көлігі туралы жаңа ақпарат пайда болды

Солтүстік Қазақстан облысының білім беру саласындағы сапаны қамтамасыз ету департаментінің баспасөз қызметі зақымдалған көлікке қатысты түсініктеме берді.

7152.kz сайтының хабарлауынша, 19 желтоқсан Солтүстік Қазақстандағы тас жолдан петропавлдық шенеуніктің оқтан зақымдалған көлігі табылған.

Бұған дейін көліктің ҚР Білім және ғылым министрлігінің Солтүстік Қазақстан облыстық білім саласындағы бақылау департаментінің атына тіркелгені белгілі болған. Көлік жүргізушісі 25 жастағы Петропавл тұрғыны.

Баспасөз қызметінің мәліметінше, ер адам осы жылдың сәуір айында жұмысқа қабылданған. Ол бұған дейін Петропавл қаласының тұрғын үй-коммуналдық шаруашылық бөлімінде және Солтүстік Қазақстан облысы Мәмлүт ауданы әкімі аппаратында жұмыс істеген.

«Демалыс және мереке күндері бұл көлік қолданылмауы керек. Тыйымға қарамастан, жүргізуші басшылықтың хабарынсыз туыстары тұратын аудандардың біріне кеткен» деді баспасөз қызметі.

Қазір тәртіп сақшылары оқиғаның барлық мән-жайын анықтау үшін жедел-іздестіру шараларын жүргізіп жатыр.