Қоғамдық сенім кеңесіне кімдердің кіргені белгілі болды

Ұлттық қоғамдық сенім кеңесінің құрамынан төрт адам шығып, олардың орындарына жаңа адамдар келді, деп хабарлады президенттің баспасөз қызметі.

Қазақстан Азаматтық альянсының президенті Бану Нұрғазиева, Жергілікті өзін-өзі басқаруды дамыту институтының директоры, Петропавл қалалық Қоғамдық кеңесінің мүшесі Сергей Худяков, Қазақстан Жазушылар одағы төрағасының бірінші орынбасары Ақберен Елгезек, Президенттік кеңес мүшесі, Жастар кадрлық резерві, Қазақстан стратегиялық зерттеулер институтының қоғамдық-саяси зерттеулер бөлімінің меңгерушісі Индира Рысты, қаржыгер Расул Рысмамбетов ҰҚКК қатарына кірді.

Кеңес мүшелерінің қатарынан Александр Данилов, Лаура Демесінова, Абылай Мырзахметов, Асқар Омаров шықты.

Қазақстандағы Ұлттық қоғамдық сенім кеңесі 2019 жылдың 12 маусымында президент Тоқаевтың тапсырмасымен құрылған болатын.

Кеңестің негізгі мақсаты «қоғамдық, саяси партиялар, азаматтық қоғам өкілдерімен кеңінен талқылау негізінде мемлекеттік саясаттың өзекті мәселелері бойынша ұсыныстар мен ұсынымдар әзірлеу» деп жарияланды.

Құрылғаннан бері кеңес құрамы 50 пайызға өзгерді. Кеңес жетінші отырысына дайындалып жатыр.