Нығматулиннің ұлы «ҚазМұнайГаз-Аэро» басшысы лауазымынан отставкаға жіберілді

Мәжілістің экс-спикері Нұрлан Нығматулиннің ұлы Нұржан Нұрланов «ҚазМұнайГаз-Аэро» ЖШС директоры қызметінен босатылды. 

Бұл туралы «ҚазМұнайГаз» ұлттық компаниясы» АҚ баспасөз қызметі хабарлады.

«19 мамырда «ҚазМұнайГаз-Аэро» ЖШС-нің жалғыз қатысушысының шешімімен компанияның бас директоры болып Шамсутдинов Ильдар Тагирұлы тағайындалды. Бұл қызметте ол Нұрланов Нұржан Нұрланұлының орнына келді» делінген хабарламада.

Мәжілістің бұрынғы спикері Нұрлан Нығматулиннің кенже ұлы Нұрланов «ҚазМұнайГаз-Аэро» компаниясын 2019 жылдың ақпан айынан бері басқарып келеді.

Мәжілістің экс-спикерінің өзі, наурыздың ортасында - бұрынғы президент Нұрсұлтан Назарбаевтың немере інісі Қайрат Сатыбалды қамауға алынғаннан кейін бірден Қазақстаннан кетіп қалды. Дереккөз атап өткендей, Нығматулиннің ізін жасыруға тырысқан белгілері бар. Ол бір ұшақпен Атырауға, одан басқа ұшақпен Бакуге ұшып барған. Оның жеке ұшағы бар.

Сәуірдің 6-нан бері тергеу жүріп жатқан «Қазфосфат» тыңайтқыштарының қымбаттауынан Нұржан Нұрланов пен оның үлкен ағасы Нұрханның пайда көргені туралы хабарланды.