Нұрсұлтан Назарбаев құдасы Алмасадам Сатқалиевке қатты ренжіді – БАҚ

Қазақстанның экс-президенті Нұрсұлтан Назарбаев жаңадан тағайындалған энергетика министрі Алмасадам Сатқалиевке қатты ренжіді.

Бұл туралы DALA INSIDE telegram-арнасы хабарлайды.

«Дербес зейнеткер Нұрсұлтан Назарбаев ҚР Энергетика министрі Алмасадам Сатқалиевке қатты ренжіді.

Сатқалиевтің қызы Анадэльдің Назарбаевтың бейресми ұлы Тауманмен неке қиғаны туралы хабар отандық ақпарат кеңістігінде кең тараған еді. Жеке басқа қатысты ақпараттың ресми органы ҚР Энергетика министрлігінің баспасөз-қызметі арқылы жоққа шығарылғаны қызық болды.

Бірақ, шын мәнінде, дереккөз 2019 жылы Лондонда бірге оқитын Анадэль мен Тауманның көңіл жарастырып, оған Алмасадам Сатқалиевтің рұқсат бергенін айтады. Ал Нұрсұлтан Назарбаев екі жасты шақырып алып, батасын беріп, сол кезде 15 жастағы Анадэльдің құлағына сырға салған» делінген хабарламада.

Арнаның мәліметінше, Қанды қаңтардан кейін екі құданың арасындағы қарым-қатынас өзгерді.

«Содан бері Алмасадам Сатқалиевтің тасы өрге жүріп, «Самұрық-Қазына» қорының тізгінін ұстаған болатын. Тәкаппарлық та пайда болды.

Бірақ «Қаңтар оқиғасынан» кейін бәрі күрт өзгерді. Кезінде Назарбаев Сатқалиевті биік лауазымдарға тағайындаса, енді соңғысы өзінің құда екенін мойындамады» делінген хабарламада.