Нұрлан Нығматулиннің егізіне қылмыстық іс қозғалды

Мәжілістің экс-спикері Нұрлан Нығматулиннің егізінің сыңары, Сенаттың экс-депутаты Ерлан Нығматулинге бопсалау фактісі бойынша қылмыстық іс қозғалды, деп хабарлайды Orda.kz.

Бұл іс белгілі кәсіпкер Рамис Ибрагимовтың арызы негізінде басталды, ол Ерлан Нығматулинді өз бизнесін заңсыз тартып алуға әрекет жасады деп айыптаған.

Бас прокуратура бұл істі тергеуге алғанын ресми түрде растады.

«Бас прокуратураның сотқа дейінгі тергеу қызметінің өндірісінде Р.Ибрагимовтың арызына қатысты бопсалау фактісі бойынша қылмыстық іс қаралуда»,  деп хабарлады Бас прокуратура.

Еске салсақ, Нығматулиндер әулетінің үлкені – Арғын Нығматулинге халықаралық іздеу жарияланған болатын. Оған мемлекет қаражатын жымқырды деген айып тағылып отыр. 6 наурызда Бас прокурордың орынбасары Әсет Шындалиев Арғын Нығматулиннің Интерпол арқылы халықаралық іздеуде екенін мәлімдеді. 8 наурызда Арғын Нығматулинге тағылған нақты қылмыстық бап жарияланып, оны 12 жылға дейін бас бостандығынан айыру қаупі бар екені айтылды.