Нұрлан Мәсімовтің ісін алқабилер қарайды  - адвокат

ҰҚК-нің бұрынғы басшысы Кәрім Мәсімовтің немере інісі пара алды және бюджет қаражатын жымқырды деп айыпталуда.

Бүгін Павлодар облысының қылмыстық істер жөніндегі мамандандырылған ауданаралық сотында облыстық полиция департаментінің экс-басшысы Нұрлан Мәсімовтің ісі бойынша алдын ала сот отырысы басталды. Онымен бірге сот отырысына оның бұрынғы орынбасары Дамир Сиразидимов пен кәсіпкер Евгений Евкович отырды.

Orda.kz тілшісі толық мәлімет алу үшін Мәсімовтің адвокаттарының бірі Дмитрий Куряченкоға хабарласты.

— Мәсімов қорғаушымен ақылдаса келе, оның ісін алқабилер қарауы туралы біржақты өтініш білдірді. Судья прокурордан айыптау актісімен танысуды сұрады және одан әрі іс алқабилердің қарауына өтетіні жарияланды. Сондай-ақ адвокаттардың бірі істі қысқарту және қамауға алумен байланысты емес басқа бұлтартпау шарасын өзгерту туралы өтініш берді, - деді Куряченко журналистке телефон арқылы.

Адвокат Нұрлан Мәсімовтің бас бостандығын шектеу аясында оның жақын туыстарының денсаулығы сыр бере бастағанын айтты. Атап айтқанда, кеше Мәсімовтің қайын енесі Алма Мәдиева жерленді.

— 8 желтоқсанда судья Мәсімовтің бұлтартпау шарасын ұзарту туралы шешім қабылдағанын және сол күні оның әйелі бұл туралы анасына хабарлағанын мысалға келтірдім. Осыдан кейін ол ауруханаға жатқызылды, комаға түсіп, кеше жерленді, - деді қорғаушы.

Сонымен қатар, Мәсімов тергеу изоляторында болған кезде оның анасының жүрегіне екі рет ота жасалған.

— Олардың қылмыс ойлап тауып, қамауда ұстауына қоса, тегі Мәсімов болғандықтан, оның туыстары да зардап шегуде, - деп атап өтті Куряченко.

Павлодар облысының бұрынғы басшысы Нұрлан Мәсімовке мемлекеттік сатып алу кезінде 90,3 миллион теңге пара алды және еншілес компаниялармен келісім-шартқа отырды деген айып тағылуда. Сонымен қатар, оған 420 миллион теңге бюджет қаражатын жымқырды деген айып та бар. Ақша артиллериялық құрал-жабдықтарды сатып алуға арналған. Онымен бірге қылмыстық іс бойынша оның бұрынғы орынбасары Дамир Сиразидимов пен кәсіпкер Евгений Евкович айыпталып отыр.

Нұрлан Мәсімов 15 қаңтарда Павлодар облыстық полиция департаментінің  басшысы қызметінен босатылды. Ол бұл қызметті 2019 ол жылдың қараша айынан бері атқарды. 22 сәуірде сот Нұрлан Мәсімовті сыбайлас жемқорлық ісі бойынша қамауға алуға санкция бергені белгілі болды. Сол күні ол іздеуге жарияланды. Жазда ҰҚК Ресей шекарасын заңсыз кесіп өтпек болған Мәсімовтің ұсталғаны туралы белгілі болды. 26 желтоқсанда Антикор істің сотқа жіберілгенін хабарлады.

Ал оның немере ағасы Кәрім Мәсімов қаңтардағы тәртіпсіздіктер мен мемлекеттік төңкеріс әрекетінің басты ұйымдастырушысы болып жарияланды. Бұл туралы 5 қаңтарда Бас прокурор Берік Асылов мәлімдеді. 18 қарашада Астанадағы қылмыстық істер жөніндегі мамандандырылған ауданаралық сотында Кәрім Мәсімовке қатысты жабық сот отырысы басталды.