Нұрқожа Қайпанов тарихымыздағы екінші әлем чемпионы атанды

Қазақстандық балуан Нұрқожа Қайпанов өзінің 70 келі салмақ дәрежесінде Албанияда өткен еркін күрестен әлем чемпионы атанды, деп хабарлайды Orda.kz.

Қайпанов 2019, 2021 жылы Азия чемпионы болды. Қазақстан тарихындағы еркін күрестен әлем чемпионы болып отырған Нұрқожа Қайпанов 2019 жылы әлем чемпионатының финалына шығып, екінші орын алған еді. Сол жолы спортшы мақсаты әлем чемпионы болу екенін айтқан еді. Міне сол мақсатына осы жолғы жарыста жетті. 

Ал тарихымыздағы еркін күрестен алғашқы әлем чемпионы Ризабек Айтмұхан болды.

 Осы жолы спортшы 70 келі салмақ дәрежесі бойынша ақтық сында жапондық Ешиносуке Аоягимен кездесті. Нұрқожа Қайпанов шешуші 
белдесуде шеберлікпен жеңіске жетіп, алғаш рет дүбірлі доданың «алтын» медалін иеленді.

Ұлттық олимпиада коммитеті оның бас бапкері Мадияр Құрамысовтың пікірін жариялады.

«Чемпионаттағы міндетімізді орындадық, дегенмен, одан да жоғары нәтиже көрсетуге болар еді, — дейді бас бапкер. — Нұрқожа тамаша күресіп, дайындық сапасын көрсетіп шықты. Ол үшін табиғи салмақ — 70 келі, бірақ Олимпиадаға қатысу үшін 74 келіге ауыстыруға мәжбүр болды. Бұл қателік болды деп есептеймін. Өзіне ыңғайлы салмақта қалғанда, әлем чемпионы атағын ертерек иеленетін еді», — деді Мадияр Құрамысов.

Еске сала кетсек, балуан қызымыз Жәмилә Бақбергенова Албанияда өткен әлем чемпионатында күміс жүлдеге ие болған еді.