Әнші Бағлан Әбдірайымов балаларға арналған тегін үйірмелердің жабылуына қатысты пікір білдірді

Қазақстанда жақында ашылған балаларға арналған тегін үйірмелерге қол жеткізуге көмектесетін бағдарлама жабылу алдында тұр.

Осыдан бірнеше күн бұрын Нұр-Сұлтанда бір топ ата-аналар Арт Спорт орталығының жабылуына қатысты наразылық білдірген. Ал күні кеше қызылордалық ата-аналар осы мәселе бойынша бас көтерді. Ата-аналар былтырдан бері мемлекет қаржыландырып келген үйірмелердің ғұмыры қысқа болғанына наразылық танытты.

Әнші Бағлан Әбдірайымов те балаларға арналған тегін үйірмелердің жабылуына қатысты Информбюро жаңалықтар қызметіне пікір білдірді.

Оның айтуынша, көпбалалы отбасылар үшін үлкен көмек.

«Мен өзім сол жерде жүргеннен кейін білемін. Кемі бір отбасында 4 бала бар. Одан көп, біз жақта 7-8 баласы бар отбасылар да бар. Сол кісілерге бұл керемет мүмкіндік болды. Жарты жылдай оқыды да, енді қаражат беруді тоқтатқаннан кейін ата-аналар қиналып қалды. 

Ата-аналардан бұрын, тарыдай болып кіріп, спорттан да, өнерден де көз алдымызда өскен балалардың болашағына балта шабу деп айтсақ болады» дейді әнші.

Бағлан Әбдірайымов «балалардың дамуына бөлінген ақша олардың болашағына қаланған кірпішпен бірдей» екенін алға тартты.

«Мұхтар Әуезовтің «Ел болам десең, бесігіңді түзе» деп айтатыны бар еді ғой. Балалардың бәрін тегін оқытып келіп, енді тоқтататын болса, балаларға аяп қалған қаражат ертең отансүйгіштіктен, патриоттық сезімнен ада қылады. 

Неге десеңіз, қазір оқып жүрген балалар дастархан басында да ата-аналарына айтып жүр деп ойлаймын. «Міне, бізді үкімет оқытып жатыр» деп ата-ана да, бала да мәз. Олардың қазірден бастап Отанға деген махаббаттары оянып келе жатыр. Ал енді шорт кесіп, оқудың бәрін тоқтататын болса, олар да кәдімгідей «бізді мемлекет алдап жатыр, біз де алдасақ болады екен» деп кішкентай балалардың психологиясын да солай бұзып жіберуіміз мүмкін» дейді Әбдірайымов.