Никель мен кобальт кен орны мемлекетке қайтарылды

Экс-вице-министр Тимур Тоқтабаевқа қатысты істі тергеу аясында Қостанай облысындағы бірегей Шевченко никель-кобальт кен орны мемлекетке қайтарылды.

Бұл туралы Антикор баспасөз қызметі хабарлады.

Кен орнында никель (1,075 млн тонна) және кобальт (585,9 мың тонна) қоры бар. Пайдалы қазбалар құны 5,6 триллион теңгеден асады.

Естеріңізге сала кетейік, Тоқтабаев 2022 жылдың қарашасында ұсталған болатын. 27 қазанда ол өзiмен үлестес тұлғаларға пайдалы қазбалардың үлкен қоры бар кен орнын беру кезiнде ауыр зардаптарға әкеп соққан қызмет бабын асыра пайдаланғаны үшiн сотталды.

Тоқтабаев жеті жылға бас бостандығынан айырылды, сонымен қатар өмір бойына мемлекеттік қызметте жұмыс істеуге тыйым салынды.

Тоқтабаев «Ерен еңбегі үшін» мемлекеттік наградасынан айырылып, қымбат мүліктері тәркіленді.

Соттың үкімі заңды күшіне енген жоқ. Сыбайлас жемқорлыққа қарсы қызмет активтерді қайтару бойынша жұмысты жалғастыруда.