Никаб киюге заң бойынша тыйым салынбақ

Қазақстанда никаб киюге заң жүзінде тыйым салынуы мүмкін, деп хабарлайды Orda.kz.

Заң жобасы жайлы мәдениет және ақпарат министрі Аида Балаева айтып берді.

«Жеке заң жоқ. Бұл мәселе ІІМ-нің заң жобасында қарастырылып жатыр. Онда қауіпсіздік мақсатында никаб киюге тыйым салу көзделген. Қазір ол мәжілісте талқыланып жатыр. Білуімше, бірінші оқылым жақын арада өтеді», – деді Аида Балаева Ақорда дәлізінде.

Қазақстанда қоғамдық орындарда діни киім кию мәселесі бірнеше жылдан бері талқыланып келеді. 

Наурыз айында Атырауда Қазақстанның туына арабша жазу жазып суретке түскен никабтағы қыздар полицияға жеткізілген еді.

Ал Қырғызстан президенті Садыр Жапаров қоғамдық орындарда никаб киюге тыйым салатын заңға қол қойды.