Негізгі ҰБТ-да 206 талапкер ереже бұзып үлгерді

Елімізде негізгі ҰБТ басталғалы 206 талапкер ереже бұзды, деп хабарлайды Orda.kz. 

Бұл туралы ғылым және жоғары білім министрлігі мәлімдеді. Белгілі болғандай, ҰБТ-ға тыйым салынған заттарды алып өтпек болған 98 бала тесттен шеттетілді. Тағы 108 адам іс-әрекеттері үшін аудиториядан шығарылып, тест нәтижесі жойылды.

Осы уақытқа дейін білім сынағына 164 мыңнан астам талапкер қатысқан. 3-аптаның қорытындысы бойынша қатысушылардың 69%-ы шекті балл жинады. Сонымен қатар, ҰБТ аяқталған соң 31 қазанға дейін бейнежазбаларға талдау жүргізіледі. Тыйым салынған заттарды пайдалану немесе ережелерді бұзу фактілері анықталған жағдайда тестілеу нәтижелері жойылады. 

Айта кетейік, негізгі ҰБТ-да алғашқы 140 балды түркістандық оқушы жинаған еді.