Неге өкпені КТ-ға түсіру бір аптаға созылып жүр? – Табынбаев

Алматы қалалық қоғамдық денсаулық сақтау басқармасының басшысы Нариман Табынбаев неге тұрғындар өкпесін компьютерлік томографияға түсіру үшін бір апта күтуге мәжбүр деген сұраққа жауап берді.

Бұл туралы Orda.kz хабарлады.

Әлеуметтік желіде Алматы тұрғыны Гүлнәр Умарова өкпенің компьютерлік томографиясын (КТ) рәсімдеуді ұзақ уақыт күту керектігі туралы айтқан. 12 тамыз жазылған адам 19 тамызда ғана компьютерлік томографиядан өте алады.

Умарованың айтуынша, адамның жағдайы КТ-ны күтіп-ақ нашарлауы мүмкін.

Алматы қалалық қоғамдық денсаулық сақтау басқармасының басшысы Нариман Табынбаев жағдайға қатысты түсініктеме берді.

Оның айтуынша, оған себептердің бірі – емханалардың тек «Orhun Medical» медициналық орталығымен келісім жасауы. Салдарынан барлық аурухананың науқастары сол орталыққа барып, ұзын сонар кезек күтеді.

– Алматы қаласында қазір томография жасалынатын 27 компьютерлік орталық бар. Оның 11-і біздің мекемелерге бағынады. Қазір біз бұл мәселені шештік. Бұл проблема болғаны рас. Томограф орналасқан медициналық орталықтың жанында орналасқан емханалардың науқастары да осы орталыққа жіберілгендіктен, адам өте көп болды, - деді Нариман Табынбаев.

Табынбаев барлық орталықтардағы тариф бірдей деп сендірді.

Міндетті медициналық сақтандыру аясында науқастар томография қызметін тегін ала алады.

Биыл қосымша төрт компьютерлік томограф сатып алынады, оның екеуі модульдік болады.