Неге COVID-19-ға қарсы екпе бар, ал дәрі жоқ?

Ресей Орталық эпидемиология ғылыми-зерттеу институты директорының ғылыми жұмыстар жөніндегі орынбасары Александр Горелов неге COVID-19-ға қарсы вакциналар бар, ал дәрілердің жоқтығын түсіндірді.

Бұл туралы Orda.kz РИА Новостиге сілтеме жасап хабарлады.

– Фармацевтика өнеркәсібі дәрі-дәрмектерді әзірлеуге бірден ауыспады, өйткені бұл маусымдық инфекция деп ойлады. Бұл бағытта жұмыстар енді жүргізіле бастады. Дәрі жасау үшін концентрация мен дозаны таңдау қажет. Сондықтан дәрі жасау екпеге қарағанда ұзағырақ уақыт алады. Зерттеулер ары қарай да жалғасады. Тек бұл вирус маусымдық деп танылғанда жұмыстар тоқтайды, - деді Горелов.

Ол дәрі -дәрмектерді әзірлеу вакциналарды жасаудан гөрі көп уақыт пен қомақты қаражатты қажет ететінін атап өтті. Гореловтың айтуынша, вакциналар бар басқа инфекциялардың мысалдары бар, бірақ дәрілік заттар жоқ, бұл қызылша мен құтыру.

– Кез келген ауруды емдегеннен гөрі оның алдын алған дұрыс, - деп баса айтты жұқпалы аурулар жөніндегі маман.