Неге Қазақстанда жануарларды жерлеу тәртібі қарастырылмаған?

Осыдан бір апта бұрын Павлодар облысында заңсыз жануарлар қорымы ұйымдастырылғандығы туралы ақпарат пайда болды.

Orda.kz редакциясы Павлодар облысы әкімдігіне «жер телімі кімге тиесілі және жануарлар қорымы заңды түрде орналастырылған ба?» деген сауалмен ресми хат жолдаған.

Әкімдіктегілердің айтуынша, Екібастұз жылу орталығының маңайындағы ескі қорымға қарсы бетте жануарлар қорымы ұйымдастырылғанынан хабардар. Қазіргі уақытта әкімдіктегілер полиция басқармасымен бірігіп, жануарларды жерлеуді болдырмау бойынша жұмыстар жүргізіп жатыр.

– Жер кодексінің 109-бабына сәйкес зираттар орналасқан және соларға арналған ортақ пайдаланудағы жерден елді мекеннің қайтыс болған әрбір тұрғынын немесе осы жерде қайтыс болған тұрғылықты жері белгісіз адамды жерлеу үшін кемінде алты шаршы метр жер телімі тегін беріледі. Жануарларды жерлеу тәртібі және орны Жер кодексімен қарастырылмаған, - деді Павлодар облысы Екібастұз қаласы әкімінің аппараты.

Павлодар облысының ветеринарлық басқармасының айтуынша, жануарлар өлекселерін жою ҚР Ауыл шаруашылығы министрлігінің 2015 жылғы бұйрығына сәйкес жүргізіледі.

Қалдықтар әдетте:

• Биологиялық қалдықтарды қайта өңдеумен айналысатын ұйымдарда жем-шөп мақсатында кәдеге жаратады;
• Биотермиялық шұңқырда көміледі;
• Арнайы қондырғыларда өртеледі.

Әкімдіктегілер жануарлар қорымы орналасқан аймақ мемлекет меншігінде екенін айтты.