Неге Ауғанстандағы БҰҰ миссиясы Алматыға орналастырылды?

БҰҰ-ның Ауғанстанға жәрдемдесу жөніндегі миссиясы неге Алматыға орналасты және онда қанша уақыт болатыны туралы ҚР Сыртқы істер министрінің орынбасары Ақан Рахметуллин айтты.

Бұл туралы Orda.kz хабарлады.

– Біз БҰҰ-ның Ауғанстанға көмек көрсету жөніндегі миссиясының рөлін жоғары бағалаймыз. Мемлекет басшысының тапсырмасы бойынша Сыртқы істер министрлігі құзыретті органдармен және қызметтермен бірлесіп, олардың ішінде Алматы әкімдігі, ІІМ, ИИДМ ААК, ҰҚК, ДСМ – Қазақстандағы БҰҰ – ның негізгі командасымен тығыз үйлестіре отырып, рейсті қабылдау және БҰҰ өкілдерін Алматыға уақытша орналастыру мәселесін жедел пысықтады, - деді Ақан Рахметуллин.

Оның айтуынша, Ауғанстаннан Алматыға келген БҰҰ мүшелері жақын арада басқа елдердегі бөлімшелерге барады.

– Олардың қатарында БҰҰ Бас хатшысының арнайы өкілі және Ауғанстанға көмек көрсету бойынша БҰҰ миссиясының басшысы Дебора Лионс ханым бар. Келген қызметкерлердің бір бөлігі жақын арада БҰҰ-ның басқа елдердегі бөлімшелеріне барады. Бірақ олардың басым бөлігі, шамамен 100 адам Қазақстанда қалады және Алматыда UNAMA-ның уақытша қашықтағы кеңсесін құрады. UNAMA-ның қашықтан істейтін кеңсесін орналастыру әзірше жарты жылға жоспарланып отыр және Ауғанстандағы жағдайдың одан әрі дамуына байланысты ұзартылуы мүмкін, - дейді ҚР Сыртқы істер министрінің орынбасары.

Рахметуллиннің айтуынша, БҰҰ мүшелерінің Алматыда тұруын, кеңсені жалға алу және басқа да шығындарды ұйым өзі қаржыландырады.

Еске салсақ, 19 тамыздан Ауғанстаннан Алматыға 2 рейс адам келгені айтылған. 2 бортта БҰҰ-ның 141 мүшесі болған.