Үндістанға барған қазақстандықтар міндетті карантинге жабылады

Коронавирустың жаңа үнді штаммына байланысты Үндістанға барған Қазақстан азаматтары екі апта міндетті карантинге жабылады, деп хабарлады Orda.kz.

– Күн сайын 400 мыңға дейін инфекция тіркелетін Үндістандағы коронавирустық инфекцияның эпидемиологиялық жағдайының нашарлауын ескере отырып, Үндістанда кең таралған штамм импортын болдырмау үшін шаралар қабылданды, - деді Денсаулық сақтау министрі Алексей Цой үкімет отырысында.

Үндістанға соңғы 14 күнде барған және үшінші ел арқылы оралған адамдар 14 күн бойы үйде оқшаулауға жататындығы туралы шешім қабылданды. ПТР тестің болуы немесе вакцина алғандығы ескерілмейді.

Бұған дейін Үндістанда коронавирус жұқтыру көрсеткіші бойынша әлемде екінші орында тұрғаны хабарланған.